Kryetarja e Bashkisë Shkodër, Voltana Ademi ka reaguar sërish sa i përket ngjarjes së krijuar në Shkodër, pas vendimit të gjykatës për arrestimin e protestuesve.
Me një postim në Facebook, Ademi e përshkruan ngjarjen e krijuar si një situatë të viteve 1945, duke theksuar se “as kur janë gjykuar kriminelët më të rrezikshëm nuk ka pasur një dislokim të tillë”.
“Mbi 70 forca policie dhe FNSH-je rrethuan Gjykatën e Shkodrës dhe bllokuan qarkullimin në rrugën para saj. As kur janë gjykuar kriminelët më të rrezikshëm, nuk ka pasur një dislokim të tillë”, shprehet kryetarja e Bashkisë Shkodër.
Më tej, ajo thotë se me lënien në burg të këtyre protestuesve “ai nuk bën gjë tjetër veçse i shton një tjetër faqe të zezë zullumit, ku janë zhytur prej 6 vitesh”.
Në përmbyllje të postimit të saj, ajo ripërsërit se nuk do bëhet asnjë hap pas, asnjë tërheqje. Ademi garanton se nuk do të ketë asnjëherë votime pa opozitën dhe se “30 qershori ka vdekur dhe është kallur”.
Postimi i plotë:
Shkodra si në vitin 1945!
Sot shkodranët por edhe shiptarët, panë me sytë e tyre apo përmes mediave skena që i kujtuan trajtimin që iu bë baballarëve të tyre nga diktatura komuniste.
Mbi 70 forca policie dhe FNSH-je rrethuan Gjykatën e Shkodrës dhe bllokuan qarkullimin në rrugën para saj. As kur janë gjykuar kriminelët më të rrezikshëm nuk ka patur një dislokim të tillë!
E për çfarë? Për gjyqin politik të 6 personave të arrestuar paligjshmërisht nga policia politike e Edi Ramës!
Edi Rama dhe bashkëpunëtorët e tij në krimin e vjetër elektoral të faktuar me audio- pergjimet e prokurorisë por edhe në krimin e ri që po konsumohet në sytë e të gjithë shqiptarëve, po shkon drejt fundit të tij të sigurtë në politikë.
Me lënien në burg të Alfredit dhe Gentianit, me arrestin në shtëpi për Bardhin, Adin, Aleksin dhe Orlandon, Edi Rama dhe drejtësia e kapur prej tij nuk bënë asgjë tjetër vetëm se i shtuan një tjetër faqe të zezë zullumit ku janë zhytur prej 6 vitesh.
E drejta e protestës nuk mund të burgoset, e drejta e fjalës nuk mund të na mohohet, të drejtat e fituara me sakrifica sublime nga 1990-a e këtej, nuk mund të na i gllabërojë askush!
Sot nga Shkodra, Edi Rama mori përsëri mesazhin më të fortë që do të jehojë deri në largimin e tij nga pushteti i fituar me votime të vjedhura, me drogën që mbuloi Shqipërinë:
Asnjë hap pas! Asnjë tërheqje! Vetëm përpapa! Përballë tij dhe falangave të verbra që po i sherbejnë edhe në shkelje të ligjit! Nuk ka dhe nuk do të ketë asnjëherë votime pa opozitën! 30 qershori ka vdekur dhe është kallur!
Përpara deri në fitore, në fitoren e Shqipërisë e shqiptarëve, të zgjedhjeve të lira, të ndershme e të barabarta, për Shqipërinë si gjithë Europa!
