Situata e përmbytjeve në Shkodër vazhdon të përkeqësohet, si pasojë e reshjeve intensive dhe fryrjes së lumenjve. Ministria e Mbrojtjes është në gatishmëri me Forcat e Armatosura në terren dhe bën me dije se ka pasur rritje të nivelit të ujit, kryesisht në Obot.
Nga FA aktualisht ndodhen në terren 20 trupa që janë në ndihmë të banorëve, 3 mjete dhe 3 varka.
Ndërkohë, raportimet e Emergjencave Civile të Bashkisë Shkodër deri në orën 23:00 të mbrëmjes së djeshme evidentojnë si problematike dy njësitë administrative Ana e Malit dhe Dajç.
Në Njësinë Administrative Ana e Malit sipërfaqja nën ujë ka kaluar 900 ha. Rrugët dytësore në fshatin Obot janë bllokuar, ndërsa uji i është afruar banesave deri tek shkallët e shtëpive.
Qindra ha toke edhe ne Muriqan janë mbuluar nga uji. Sipas prognozave, nëse vijojnë shkarkimet nga hidrocentralet, në fshatin Obot nuk mund të hyhet më as me makinat e larta të ushtrisë, por vetëm me varka me motor për lëvizjen e banorëve.
Ujësjellës Oblika 1 është përmbytur, pra nuk është në funksion. Si rrjedhojë janë pa ujë të pijshëm pallatet në Oblikë dhe një pjesë e fshatit Oblikë, në total 800 banorë. Rrezikon të përmbytet ujësjellësi Oblika 2. Ka nevojë emergjente për bazë ushqimore për blegtorinë.
Ndërkohë në njësinë Administrative Dajç, nga ora 17.00 deri në orën 23.00, niveli i ujit është rritur me 20 cm. Sipërfaqja e tokës së përmbytur është mbi 70 ha dhe konkretisht: Mushan mbi 30 ha, Shirq mbi 30 ha dhe Darragjat 10 ha.
Energjia elektrike për momentin është rikthyer pas ndërprerjes prej disa orësh në të gjithë territorin. Për momentin, lëvizja nuk është problem, por është e rëndësishme të njoftohet komuniteti për nivelin e shkarkimeve pasi banorët i kanë stanet në fusha dhe mund të dëmtohen.
Situata vijon të mbahet në monitorim nga Bashkia e Shkodrës, e cila thotë se është e angazhuar me te gjithë strukturat e saj.
