Një shkencëtar në Angli, i cili i jep këshilla qeverisë së drejtuar nga Boris Johnson në lidhje me situatën epidemiologjike të Covid-19, ka akuzuar ministrat e kabinetit dhe vetë kreun e ekzekutivit, se kanë planifikuar që të infektohen sa më shumë persona në vend, me këtë virus që të rritet imuniteti i tufës.
Pretendimi vjen pasi kufizimet në Angli u lehtësuan të hënën, me klubet e natës që u hapën për herë të parë gjatë pandemisë, dhe ku të gjitha rregullat për distancën shoqërore vendosjen e maskave nuk u respektuan, duke sjellë një rritje të rasteve të reja, shkruan The Guardian.
“Ajo që ne po shohim është një vendim nga qeveria për të infektuar sa më shumë njerëz të jetë e mundur, sa më shpejt të jetë e mundur dhe, në të njëjtën kohë, për të fajësuar publikun për pasojat. Duket se për qeverinë kapitali politik që do të fitojë nga një qasje e tillë vlen më shumë se sa dëmi që po i bëhet shëndetit dhe shërbimeve shëndetësore”, tha Robert West.
Një valë e madhe infeksionesh, e shoqëruar me vaksinimin masiv, do ta shtynte Anglinë më pranë “imunitetit të tufave”, ku mjaft njerëz në popullatë janë rezistente ndaj virusit.
Pragu për imunitetin e tufës me variantin Delta është i paqartë, por shkencëtarët vlerësojnë se transmetimi do të duhet të bllokohet në rreth 85% të popullsisë.
