Kërkuesit këshillojnë qytetarët që të mos fusin në banesën e tyre këpucët dhe rrobat, nëse kanë takuar dikë me koronavirus. Frika nga prekja e virusit vdekjeprurës, ka shtuar edhe më shumë masat. Por një studim i fundit kryer nga revista mjekësore “The Lancet”, ka dhënë përgjigje sa sa gjatë qëndron koronavirusi në trupin e njeriut. Në artikull shkruhet se pacientët me koronavirus mund ta mbajnë patogjenin në traktin e tyre të frymëmarrjes për 37 ditë.
Duke pasur parasysh që periudha aktuale e karantinës rekomandohet në 14 ditë, pacientët mund të jenë ngjitës për më tepër kohë, edhe pasi simptomat e tyre zhduken.
Pasi shërohesh, ekziston rreziku që të infektohesh sërish?
Të dhënat nga zyrtarët shëndetësorë në provincën Guangdong të Kinës raportuan se 14% e njerëzve që u shëruan, pasi u testuan përsëri, dolën pozitivë me koronavirus.
Në fund të shkurtit, “Reuters” raportoi për një grua në Osaka, Japoni, që gjithashtu rezultoi pozitive pasi ishte shëruar nga një infeksion i mëparshëm. Një rast i ngjashëm u raportua në Korenë e Jugut.
Po si e shpjegojnë këtë dukuri ekspertët?
Ekziston mundësia që virusi të jetë i fjetur në organizëm, pas një periudhe fillestare të sëmundjes me simptoma minimale, përpara se të sulmojë mushkëritë. Por nuk përjashtohet edhe një gabim njerëzor, siç është testimi i pasaktë ose pacientët që dalin nga spitali para kohe. Për ta parandaluar, këshilla e vetme është vetë-izolimi.
