Në Asamblenë e Shoqatës së Bashkive të Shqipërisë, u vendos për shkarkimin e Voltana Ademit. Kryebashkiakja e Shkodrës, Voltana Ademi, ka mbajtur postin e kryetares së SHBSH-së.
Në vend të saj është zgjedhur Pjerin Ndreu, kryetari i Bashkisë së Lezhës. Ndërsa nënkryetarë u zgjodhën kryebashkiakja e Përmetit, Alma Hoxha dhe ai i Pogradecit, Ilir Xhakolli. Pjerin Ndreu, në një prononcim për mediat tha se kjo Asamble nuk ishte funksionale prej dy vitesh.
“Kjo është Asamble e jashtëzakonshme e thirrur nga 1/5 e anëtarëve, në këtë Asamble marrin pjesë të gjithë anëtarët e Bashkive. Prej dy vitesh nuk ishte funksionale, ne e kemi parë si të domosdoshme mbledhjen e kësaj Asambleje, ku kemi zgjedhur dhe anëtarët e Shoqatës dhe në këto kushte ne kemi kërkuar mbledhjen. Pas diskutimeve dhe votimeve është zgjedhur kryetar unë dhe nënkryetar Alma Hoxha dhe Ilir Xhakolli”, ka thënë Ndreu.
Në mbledhje ishin prezentë disa prej kryetarëve të Bashkive, por ajo ç’ka u vu re lidhej me mungesën e vetë Voltana Ademit.
