Deputeti i PS-së, Petro Koçi, ka deklaruar se shkarkimi i Metës do ishte leksion për politikën. Përfaqësuesit e presidentit do t’i përgjigjen 72 pyetjeve që i drejtuan gjyqtarët kushtetues, dhe Kuvendi, si palë kërkuese. Për deputetin e Partisë Socialiste Petro Koçi, një vendim pro shkarkimit do të ishte i mirëpritur. I ftuar në emisionin “Breaking” në Top News, ai deklaroi se Meta ka shkelur hapur Kushtetutën gjatë fushatës për zgjedhjet e 25 prillit, por po ashtu dhe me shtyrjen përtej afateve të caktuara, të zgjedhjeve vendore.
“Një vendim që e shkarkon do ishte pozitiv, por dhe një leksion ndaj politikës shqiptare. Meta ka shkelur hapur Kushtetutën, sidomos me shtyrjen e zgjedhjeve vendore dhe me deklaratat që nxisin njerëzit për dhunë fizike ndaj njeri-tjetrit dhe institucioneve. Po ashtu aspekti psikologjik i tij, është e palejushme që presidenti të veprojë kur është i rënduar nga ana psikologjike. Sigurisht një pacient i tillë nuk e pranon të vërtetën, por ka të tjerë që certifikojnë gjendjen dhe e trajtojnë”, tha ai.
I pyetur për bashkëpunimin mes Metës dhe Berishës, Koçi u shpreh se ishte e pritshme, pasi lidhja e tyre ka qenë e hershme. “Meta dhe Berisha janë lidhur që në ‘92, kanë lidhje të hershme. Meta ka adhurim për personalitetin e Berishës. Janë të njëjtë.
Por është e papranueshme që ai është president dhe njëkohësisht mban anë. Ai duhet të jëtë i paanshëm, ka dalë hapur si pjestar i LSI-së dhe jo si president për bashkëpunimin me Berishën. Bashkëpunimi i tyre është i natyrshëm. Janë e njëjta kategori në politikë. Ishte e pritshme”, u shpreh Koçi.
