Një ditë pas shkarkimit nga detyra të Kryeprokurores së Tiranës, Elisabeta Imeraj, KLP do të caktojë sot një drejtues të përkohshëm për të zëvendësuar postin e saj. Mbledhja do të zhvillohet në orën 12:00, ku pritet të caktohet përkohësisht një drejtues i Prokurorisë së Tiranës. Më pas, do të hapet gara për drejtuesin e ri.
Elisabeta Imeraj, një prej prokuroreve më të njohura në vend, me 17 vite eksperiencë në organin e akuzës, ka dalë përfundimisht nga sistemi i drejtësisë. Imeraj, e cila njihet si prokurorja e dosjeve të bujshme, është shkarkuar nga detyra nga Kolegji i Posaçëm i Apelimit, pas seancave maratonë të zhvilluara si rrallë herë në procesin e Vettingut.
KPA e gjeti me probleme znj. Imeraj në të tre shtyllat e vlerësimit. Gjatë leximit të vendimit, Ina Rama tha se Imeraj nuk justifikon pasurinë, duke evidentuar pronën 2500 m2 tek ish fusha e aviacionit, dhe sipas saj, s’ka burime të ligjshme.
“Po ashtu edhe për tokën arë të ndodhur në Mullet, s’ka burime. Për apartamentin ndodhur në Tiranë prej 66 m2 dhe shtesë subjekti i rivlerësimit ka bërë deklarim të pasaktë. Për shlyerjen e kredive të marra në 2006 dhe në 2008 subjekti i rivlerësimit dhe personi i lidhur kanë patur pamjaftueshmëri për shlyerjen e këtyre kredive”, tha ajo.
Sipas saj, për figurën rezulton se subjekti ka mohuar faktet për ish- kunatin, duke treguar jo korrektësi të magjistratit. “Subjekti ka treguar sjellje jo profesionale duke kontaktuar përfaqësues të ONM që ndiqte procesin e saj. Vendosja e kontakteve me ONM për çdo arsye e jo e duhur dhe jo ligjore. Është sjellje e papërshtatshme”, tha Ina Rama, teksa njoftoi shkarkimin.
