Një 40 vjeçar në Tiranë ka rënë në prangat e policisë të rajonit nr.4. Policia e Shtetit bën me dije se ai akuzohet për tregtimin e drogërave të forta si kokainë dhe ekstazi.
Ai është kapur në flagrancë dhe gjatë kontrollit i janë sekuestruar 11 doza kokaine dhe ekstazie. Policia më pas ka ushtruar kontroll dhe në banesën e tij dhe ka gjetur një sasi tjetër droge, një peshore elektronike si dhe një pistoletë “Zastava”. Ai shpërndante kryesisht në zonën e freskut dhe të Kinostudios.
NJOFTIMI
Në vijim të punës për kontrollin e territorit, kapjen e personave që shpërndajnë lëndë narkotike apo që posedojnë armë zjarri, shërbimet e Komisariatit të Policisë Nr. 4, në bashkëpunim me Seksionin për Hetimin e Narkotikëve në Drejtorinë Vendore të Policisë Tiranë, finalizuan operacionin e koduar “Kombinimi”, në kuadër të të cilit u bë kapja dhe arrestimi në flagrancë i shtetasit:
– E. R., 40 vjeç, banues në Tiranë.
Shërbimet e Policisë kanë marrë informacione në rrugë operative se shtetasi E. R. tregtonte lëndë narkotike kokainë, kanabis dhe ekstazi në zonën e Freskut dhe Kinostudios, në Tiranë.
Mbi bazën e këtyre informacioneve, u bë e mundur që gjatë zhvillimit të operacionit, në zonën e Freskut, të kapej në flagrancë 40-vjeçari, të cilit gjatë kontrollit fizik iu gjetën 11 doza me lëndë narkotike të dyshuar kokainë.
Kontrolli ka vijuar në banesën e 40-vjeçarit, ku Policia ka gjetur një armë zjarri pistoletë tip “Zastava”, doza të tjera me kokainë, cannabis sativa dhe ekstazi, si dhe peshore elektronike që shërbente për peshimin e lëndës narkotike.
Materialet procedurale i kaluan Prokurorisë pranë Gjykatës së Shkallës së Parë Tiranë, për veprime të mëtejshme hetimore, për veprat penale “Armëmbajtja pa leje” dhe ”Prodhimi dhe shitja e narkotikëve”.
