Vendet me një potencial të fuqishëm të aseteve financiare, investojnë shifra të mëdha parash për programet e kërkimi dhe të zhvillimit, pasi kjo strategji përgatit se kush do të komandojë të nesërmem në lidhje me ekonominë botërore.
Vendet të cilat krijojnë programe dhe shpenzime të tilla, kanë luksin që tekologjinë e re, ta kthejnë në produkte të reja në procese dhe më shumë shërbime për konsumatorët duke iu përgjigjur kushteve dhe kërkesave të kohës.
Sa i takon shpenzimeve për programet e kërkim-zhvillimit Shqipëria vendin e fundit në rajon dhe në Evropë. Shifra e përkthyer në përqindje zë 0.2 të Prodhimit të Brendshëm Bruto, kjo e dhënë është publikuar nga Instituti i Statistikave të UNESCO-s. Ndërsa e përkthyer në shifra konkrete, shkon në 37 milionë dollarë, që tregon edhe njëherë se kjo shifër është më e ulëta në rajon.
Veni i parë në rajon për shpenzimet në kërkim-zhvillim:
“Lideri i rajonit për shpenzimet e kërkim-zhvillimit është shteti i Serbisë. Shpenzimet për këtë pjesë në përqindje shkojnë në 0.8% të PBB-së, apo e thënë ndryshme në vlerën e 757 milionë dollarë, ndërsa numri i kërkuesve përllogaritet rreth 1,830 për 1 milion banorë. Duke iu referuar të dhënave të publikuara , peshën më të madhe e zënë bizneset me 224 milionë dollarë.
Renditja në vendin e dytë në rajon për shpenzimet e kërki-zhvillimit:
“E dyta renditet Maqedonia, shpenzimet e së cilës për Kërkimin dhe Zhvillimin janë rreth 0.5% e PBB-së, apo 145 milionë dollarë. Maqedonia numëron rreth 838 kërkues për 1 milion banorë.Ndërsa Mali i Zi dhe Bosnja, shpenzojnë për Kërkimin dhe Zhvillimin përkatësisht 0.4% dhe 0.3% të Prodhimit të Brendshëm Bruto. Numri i kërkuesve për 1 milion banorë është 673 në Malin e Zi dhe 266 në Bosnjë dhe Hercegovinë’-shkruan Monitor.
BE-ja mban të qëndrueshëm nivelin e shpenzimeve për kërkim dhe zhvillim
Në 2016-n, Eurostat njofton se të gjitha vendet e Bashkimit Europian së bashkë shpenzuam për Kërkim-Zhvillimin 300 miliardë euro. Përqindja e shpenzimeve për Kërkim Zhvillim ndaj Prodhimit të Brendshëm Bruto qëndroi e qëndrueshme në nivelin 2.03%. Dhjetë vite më parë, shpenzimet në raport me PBB-në ishin në nivelin 1.76%.
Krahasuar me ekonomitë e mëdha, shpenzimet për kërkim dhe zhvillim në BE ishin shumë më të ulëta se në Korenë e Jugut, ku në 2015-n përllogariteshin të ishin 4.23%, Japoni 3.9%, Shtetet e Bashkuara 2.79%, ndërkohë që kanë të njëjtin nivel si Kina 2.07% në 2015-n.
Vendet evropiane, me shpenzimet më të larta:
Në 2016-n shpenzimet më të larta për Kërkim dhe Zhvillim u shënuan në Suedi dhe Austri, ku në të dy shtete e kalonin nivelin prej 3% të PBB-së, sipas Eurostat. Këto shtete ndiqeshin ngushtë nga Gjermania, Danimarka, Finlanda, Belgjika, Francë, Holandë dhe Slloveni, shpenzimet e të cilave luhateshin nga 2-3% të PBB-ve të vendeve përkatëse.
Dhjetë shtete anëtare regjistruan shpenzime në Kërkim Zhvillim nën 1% të PBB-së: Letonia (0.44%), Rumania (0.48%), Qipro (0.50%), Malta (0.61%), Lituania (0.74%), Bullgaria (0.78%), Sllovakia (0.79%), Kroacia (0.84%), Polonia (0.97%) dhe Greqia (0.99%).
