Një vajzë është kthyer në “mollë sherri”, që solli një bilanc të rëndë me plagosjen me armë zjarri të dy personave. Burimet zyrtare të policisë njoftuan se nga ngjarja mbetën të plagosur shtetasit Gentian Diva, 40 vjeç, banues në Fushë-Mamurras dhe Alban Skonja, 39 vjeç, banues në Durrës.
Pas të shtënave, policia arrestoi 19-vjeçarin Andi Diva, nipi i një prej të plagosurve, ndërsa në banesën e tij u gjet dhe një armë. Burime për “Panorama.al” bëjnë të ditur se autorët e dyshuar të plagosjes, të shpallur në kërkim nga policia, janë Kastriot Lleshaj dhe Armando Lleshaj, kushërinj me njëri-tjetrin.
Fillimisht ata kanë debatuar me njëri-tjetrin dhe kur Gentian Diva me nipin e tij Andin dhe 39-vjeçarin Skonja po largoheshin me makinë, kushërinjtë Kastriot dhe Armando Lleshaj kanë qëlluar me armë duke i plagosur. Të dy ata janë shpallur në kërkim nga policia.
Por përgjigje me zjarr ka pasur dhe nga pala e dëmtuar, ndërsa 19-vjeçari Andi Diva është kapur në flagrancë me armë nga policia. Arma e përdorur prej autorëve të dyshuar nuk është gjetur nga policia.
