Mbretëria e Bashkuar ka shënuar sot sërish një bilanc të rëndë, të viktimave të shkaktuara nga koronavirusi.
Sipas mediave britanike, në 24 orët e fundit në Mbretërinë e Bashkuar janë regjistruar 847 persona të vdekur, 14 më pak se ditën e djeshme kur u regjistruan 861.
Ndërkohë janë shtuar 5,599 raste të reja, duke e çuar një 108,692 numrin total të personave të infektuar.
Ekspertët zyrtarë të shëndetit publik janë shprehur se bilanci i viktimave nga COVID-19 në Britani me shumë gjasa do të arrijë në 40 mijë. Ndërsa nuk kanë munguar edhe kritikat për qeverinë, duke e akuzuar se po vepron shumë ngadalë.
Mbretëria e Bashkuar shënoi dje bilancin më të rëndë nga të gjitha shtetet e Evropës. Ajo renditet e pesta në botë për numrin më të madh të viktimave (14,576), pas SHBA-ve (34,641), Italisë (22,170), Spanjës (19,315) dhe Francës (17,920).
Britania e Madhe është një ndër vendet e pakta që nuk e ka raportuar numrin e personave që janë shëruar nga virusi COVID-19. Raportohet se 1,559 persona në vend ndodhen në gjendje kritike për jetën.
Më shumë se 2,2 milionë njerëz nga e gjithë bota janë prekur nga koronavirusi, ndërsa mbi 148 mijë persona kanë humbur jetën.
