Pak minuta pas nisjes së protestës për shembjen e Teatrit, Meta ka dalë me një thirrje për qytetarët.
Përmes një postimi në Facebook, Meta iu bën apel njerëzve që do të marrin pjesë në protestë që të mos i përgjigjen dhunës me dhunë, por me besim te Demokracia dhe Triumfi i saj mbi talebanizmin dhe oligarkinë.
Kreu i shtetit shprehet se është pro një hetimi ndërkombëtar për shkatërrimin e Teatrit, veprim të cilin e konsideron antikushtetues.
Postimi i plotë:
Mbështes fuqimisht një hetim ndërkombëtar për shkatërrimin antikushtetues, të paligjshëm dhe në mënyrën më antieuropiane të Teatrit Kombëtar.
Gati të bashkëpunoj me Aleancën për Mbrojtjen e Teatrit, si dhe me çdo institucion europian dhe ndërkombëtar për Kulturën.
Europa dhe bota demokratike po e kupton edhe me qartë se ç’po ndodh këtu.
Mos iu përgjigjni dhunës me dhunë, por me besim te Demokracia dhe Triumfi i saj mbi talebanizmin dhe oligarkinë.
