Aksioni i ndërmarrë nga qeveria shqiptare për shembjen e banesave në Himarë sipas planit urbanistik, ka sjellë reagime të shumta në kampin grek. Presidenti grek Prokopis Pavlopulos theksoi se Shqipëria do të ketë pasoja nga ky veprim që ka ndërmarrë ndaj cenimit të të drejtave të minoritetit grek.
“Sjelljet që shkelin të drejtat themelore të njeriut, siç janë të drejtat e pakicave dhe të drejtën më të lartë, atë të pronës minojnë rregullat e së Drejtës Ndërkombëtare në përmbushjen e detyrimeve të vendosura nga Bashkimi Evropian në kapitujt e “Acquis”, theksoi sot Pavolpulos, i cili ndoqi nga afër festimet për 105 vjetorin e çlirimit nga zgjedha Osmane.
Qiproja
Presidenti grek komentoi edhe zhvillimet në raport me Turqinë ku shkaku i përplasjes midis dy vendeve vijon të mbetet Qipro. Pavlopolus theksoi se Turqia mbetet një kërcënim serioz ndaj territoreve greke në ishullin e Qipros. Duke folur në festimet për 105 vjetorin e çlirimit nga zgjedha Osmane, kreu i shtetit grek i adresoi Turqisë një mesazh se Greqia ka të gjithë të drejtën për të mbrojtur qoftë edhe me forcë Ishujt Dodekanezë.
“Greqia ka të drejtën absolute dhe detyrimin për të mbrojtur ishujt e saj për sa kohë që ka një kërcënim real ndaj tyre” theksoi ai. Presidenti grek vuri në dukje se “Turqia përbën një kërcënim serioz nisur që nga prania e saj në Qipro dhe shkeljet e vazhdueshme që ka kryer në Detin Egje”, u shpreh kreu i shtetit grek.
Ai këmbënguli se Dodekanezia nuk është vetëm territor grek, por edhe evropian, duke shtuar se “ne kemi për detyrë të mbrojmë kufijtë e vendit tonë dhe Bashkimit Evropian”.
Pavlopulos denoncoi deklaratat e zyrtarëve turq rreth pakicës turke dhe tha se “këto raporte shkelin drejtpërsëdrejti Traktatin e Lozanës, janë të papërfytyrueshme dhe të papranueshme”.
Kreu i shtetit vuri në dukje se Traktati i Lozanës në mënyrë eksplicite përcakton ekzistencën e një pakice myslimane në të cilën liritë e saj fetare janë plotësisht të ruajtura. Pavlopulos theksoi se Traktati i Lozanës “nuk lë hapësirë për zonat gri, as për dyshim, pasi i përcakton saktësisht kufijtë”.
Maqedonia
Pavlopoulos i bëri thirrje Maqedonisë që të braktisë “rrugën e falsifikatorit të historisë që minon orientimin e tij evropian” dhe të respektojë të Drejtën Ndërkombëtare dhe Evropiane, duke thënë se “këmbëngulja në përdorimin e emrit ekspozon irredentizëm”. TIRANA TODAY
