Sekretari i përgjithshëm i NATO-s, Jens Stoltenberg, kërkon që Rusia të tërheqë oficerët e saj nga lindja separatiste e Ukrainës.
Në një vizitë në Odesa, Stoltenberg deklaroi se Moska ka përgjegjësi të veçantë në zbatimin e marrëveshjes së Minskut, teksa i kërkon edhe që të ndërpresë destabilizimin e territorit lindor të Ukrainës.
“NATO e thotë shumë qartë se Rusia ka një përgjegjësi të veçantë në zbatimin e marrëveshjeve të Minskut dhe se ajo duhet të tërheqë trupat, të gjithë oficerët e saj nga lindja e Ukrainës dhe të ndërpresë destabilizimin e këtij territori”, tha zyrtari i NATO-s.
Kujtojmë se Ukraina dhe Perëndimi fajësojnë Rusinë si autore për furnizimin e separatistëve prorusë me armë dhe për vendosjen e ushtarëve në lindje të vendit.
Presidenti Zelensky ka kërkuar të ringjallë një proces paqeje për t’i dhënë fund konfliktit pesë vjeçar separatist në Lindjen e Ukrainës që ka marrë rreth 13,000 jetë njerëzish.
