Shtetet e Bashkuara të Amerikës vijojnë që të raportojnë shifra të frikshme të viktimave të shkaktuara nga koronavirusi.
Sipas të dhënave të Johns Hopkins University, në 24 orët e fundit janë regjistruar 2502 viktima, në krahasim me 2200 që u shënuan një ditë më parë.
Kështu numri total i personave që kanë humbur jetën nga COVID-19 në SHBA ka shkuar në 61,669.
Vendi më i prekur në SHBA vijon të jetë New York, i cili numëron 306,158 raste infektimi dhe 23,474 viktima. Ndërkohë edhe New Jersey ka njohur një përkeqësim të ndjeshëm të situatës, teksa regjistron më shumë se 116 mijë të infektuar dhe 6,770 viktima.
SHBA regjistron 1,064,572 persona të prekur nga koronavirusi, prej të cilëve 147,411 pacientë janë shëruar. Sipas Worldometer, numri i rasteve ende aktive në SHBA përllogaritet 855,492 persona.
SHBA udhëheq listën e vendeve më të prekura nga koronavirusi në botë, teksa ndiqet nga Italia, Spanja, Franca, Gjermania, Mbretëria e Bashkuar, Turqia, Kina, Rusia, Irani etj.
COVID-19 ka prekur më shumë se 3,2 milionë njerëz nga e gjithë bota, ndërsa i ka marrë jetën mbi 228 mijë personave.
