SHBA ka shënuar rekord viktimash nga koronavirusi, ku në 24 orë kanë humbur jetën 2.405 persona. Numri i përgjithshëm i personave që kanë humbur jetën nga COVID-19 ka shkuar në 26.633.
Që nga shpërthimi i pandemisë, në SHBA janë regjistruar 609.240 raste me koronavirus. Numri i rasteve ditore vazhdon të rritet, dhe SHBA është një nga vendet më të prekura nga COVID-19.
Presidenti Donald Trump deklaroi pak orë më parë, se do të ndërpresë fondet ndaj OBSH-së, pasi kjo e fundit, sipas tij, ka dështuar në menaxhimin e situatës.
Trump ka deklaruar se ai ka udhëzuar administratën e tij, që të ndalojë fondet për Organizatën Botërore të Shëndetësisë.
Kreu i Shtëpisë së Bardhë është shprehur se OBSH kishte “dështuar në detyrën e saj themelore”, në përgjigjen e saj ndaj shpërthimit të koronavirusit.
Trump ka akuzuar edhe më parë OBSH për njëanshmëri ndaj Kinës. “Unë po e drejtoj administratën time për të ndaluar fondet, ndërsa është bërë një rishikim për të vlerësuar rolin e Organizatës Botërore të Shëndetit, në keqmenaxhimin dhe mbulimin e përhapjes së koronavirusit”, tha Trump në një konferencë shtypi në Shtëpinë e Bardhë.
