Vazhdojnë përplasjet politike dhe ekonomike ndërmjet dy superfuqive, SHBA-s dhe Kinës. Së fundmi, presidenti Trump ka kërkuar pengimin e huave për Kinën. Ai i ka bërë kërkesa disa herë Bankës Botërore që të ndalojë huadhëniet për shtetin kinez.
Megjithatë, Banka Botërore duket se është treguar tërërisht indiferente ndaj thirrjeve të Trump. Dje ky institucion ka miratuar planin e huave për Kinën, duke refuzuar çdo kërkesë penguese që ka ardhur nga Trump dhe SHBA-të.
Mësohet se Banka Botërore ka miratuar për Kinën një hua që kap vlerën e 1.5 miliardë dollarë, me shkallë të ulët të interesit deri në vitin 2025.
I menjëhershëm ka qenë reagimi i presidentit Trump, i cili ka shkruar në twitter “Pse Banka Botërore po i jep hua Kinës? A mund të jetë e mundur kjo? Kina ka shumë para, e nëse nuk ka, i krijon. Ndaluni!”
Mesazhi i tij përkon me qëndrimin e sekretarit amerikan të thesarit, Steven Mnuchin, i cili në Dhomën e Përfaqësuesve tha se Shtetet e Bashkuara janë ankuar kundër programit të huave për Kinën.
Banka Botërore i dhuroi Kinës 1.3 miliardë dollarë hua gjatë vitit 2019. Ndërsa në vitin 2017 kjo shifër ishte 2.4 miliardë dollarë, shkruan “The Guardian”.
