Shtetet e Bashkuara të Amerikës po përballen me një nga periudhat më të errëta në histori. Pandemia e koronavirusit iu ka marrë dhe vazhdon t’i marrë jetën mijëra njerëzve, ndërsa ekonomia e vendit është në gjendjen e saj më të keqe.
SHBA-të vijojnë të shënojnë mbi 1 mijë viktima në ditë nga koronavirusi, teksa në 24 orët e fundit kanë humbur jetën 1,008 persona. Një ditë më parë bilanci pa një përmirësim të dukshëm, ku në vend u shënuan vetëm 750 viktima, shifra më e ulët që nga fundi i muajit mars.
Ndërkohë shihet të ketë një ulje rekord të numrit të rasteve të reja. Gjatë 24 orëve të fundit janë shënuar mbi 18 mijë raste të reja, shifra më e ulët kjo që nga muaji mars.
Që nga shpërthimi i pandemisë, SHBA-të kanë regjistruar më shumë se 1,3 milionë raste infektimi dhe 81,795 persona të vdekur.
Ajo kryeson listën e vendeve më të prekura në botë, duke u ndjekur pas nga Spanja, Rusia, Mbretëria e Bashkuar, Italia, Franca, Gjermania, Brazili, Turqia, Irani etj.
Deri më tani janë, në SHBA janë shëruar mbi 262 mijë persona ndërsa 1,041,814 raste janë ende aktive. Prej këtyre, 16.484 pacientë ndodhen në gjendje të rëndë shëndetësore.
Më shumë se 4,2 milionë njerëz nga e gjithë bota janë prekur nga koronavirusi, ndërsa mbi 287 mijë persona kanë humbur jetën.
