Sekretari amerikan i Shtetit, Mike Pompeo, shprehet se SHBA është e shqetësuar nga veprimet e Turqisë në pjesën lindore të Detit Mesdhe.
“Vendet në rajon duhet t’i zgjidhin mosmarrëveshjet në mënyrë diplomatike dhe paqësore, përfshirë çështjet e sigurisë, burimeve të energjisë dhe çështjet detare. Tensionet e ngritura ushtarake nuk e ndihmojnë askënd tjetër pos armiqtë, të cilët do të donin të shihnin përçarje në unitetin transatlantik”, tha Pomepo gjatë një vizite në Qipro, ku u takua me presidentin e këtij vendi, Nicos Anastasiades.
Tensionet mes Greqisë dhe Turqisë janë rritur për shkak të pretendimeve rreth territorit ujor dhe shfrytëzimit të pasurive natyrore, që ndodhen në pjesë të kontestuara të kufirit detar.
Reuters raporton se Turqia ka dërguar dy anije hulumtuese në dy zona të ndryshme në Mesdhe, duke nxitur reagimin e ashpër të Greqisë dhe Qipros.
“Ne mbesim thellësisht të shqetësuar nga operacionet e vazhdueshme të Turqisë. Republika e Qipros e ka të drejtën për shfrytëzimin e burimeve të veta natyrore, përfshirë të drejtën për hidrokarbure të gjetura në zonën e vet ekskluzive ekonomike”, tha Pompeo.
