Sot Shqipëria do të luajë në “Elbasan Arena”, miqësoren me Jordaninë. Formacioni pritet të jetë 4-2-3-1. Strakosha duket i pazëvendësueshëm mes dy shtyllave. Më pas, nga e djathta Hysaj, ndërsa në të majtë Lenjani, por një opsion është edhe Binaku i Malmos. Qendra e mbrojtjes përbëhet nga Mavraj e Gjimshiti, të dy pa shumë minuta në këmbë.
Basha dhe Lila do të bëjnë lidhjen e mbrojtjes, me pjesën para të ekipit, ndërsa në linjën ofensive priten Grezda, Memushaj e Gavazaj, ose në vendin e ish-mesfushorit të Skënderbeut, Myrto Uzuni, i thirrur për herë të parë në Kombëtare. Balotazhin për pozicionin e vetëm në sulm, mes Balajt e Manajt, mesa duket e ka fituar shkodrani. Gjithsesi, sot mund të mësohen më shumë të reja nga 11-shja e italianit.
Panucci: Nëse humbasim, do na quani katastrofë
Para ndeshjes kundër Jordanisë, trajneri Christian Panucci u shpreh se pret që skuadra të bëjë një lojë të mirë, sigurisht duke pasur mendjen edhe te sfida me Izraelin, që është edhe e vlefshme për Ligën e Kombeve.
“Kemi disa lojtarë që nuk kanë luajtur shumë kohët e fundit. Grupi ka punuar mirë, kemi shpirtin e duhur për të bërë një ndeshje shumë të mirë nesër. Pres që djemtë të bëjnë një ndeshje të rëndësishme, sepse mbetet ndeshje e kombëtares”.
Andi Lila: Forca e ekipit tonë është grupi
Sakaq, futbollisti Andi Lila ka folur rreth ndeshjeve ndaj Jordanisë dhe Izraelit, ndërkohë që nuk fshehu emocionet që përjeton kur merr ftesë për t’u grumbulluar me kuqezinjtë. “Jam që në 2007 me Kombëtaren, dhe gjithmonë kur vjen ftesa për grumbullim, më duket sikur është hera ime e parë.
Herën e fundit nuk më zuri gjumi një natë para se të vija në grumbullim. Është gjëja më e bukur që mund t’i ndodh një lojtari. Forca e ekipit tonë është grupi. Nëse kemi një grup kompakt, ndeshja me Izraelin do flasë në favorin tonë.
Shpresojmë shumë të marrim pikët maksimale, dhe të jemi të parët në grup. Përqëndrimi si fillim është i gjithi në ndeshjen me Jordaninë. Shumë respekt për të gjithë kapitenët, por në Kombëtare të gjithë lojtarët janë njësoj. Roli i kapitenit nuk krijon diferenca me pjesën tjetër të lojtarëve”, është shprehur Lila.
