Kuvendi nis sot seancën e parë plenare për këtë vit. Kjo do të jetë një seancë e veçantë pasi do të jetë i pranishëm edhe presidenti turk, Recep Tayyip Erdogan, i cili do vizitojë Shqipërinë. Pak ditë më parë, nën drejtimin e kryetares së Kuvendit, Lindita Nikolla u zhvillua mbledhja e Konferencës së Kryetarëve. Konferenca shqyrtoi dhe miratoi programin e punës së Kuvendit për periudhën 17 janar-25 shkurt 2022, si dhe kalendarin 3 javor të punimeve të Kuvendit për periudhën 17 janar-4 shkurt 2022. Po ashtu, konferenca shqyrtoi dhe miratoi edhe kalendarin e kontrollit parlamentar të Kuvendit, që përcakton agjendën vjetore për kontrollin e mbikëqyrjes parlamentare për institucionet e pavarura dhe agjencitë ligjzbatuese, ndërsa u vendos se në bazë të Kushtetutës dhe Rregullores së Kuvendit seanca e parë plenare për sesionin e dytë të legjislaturës së X do të zhvillohej ditën e sotme.
Ky sesion pritet të ketë debate të forta politike mes palëve në Kuvend, ku një çështje e nxehtë do të jenë edhe ndryshimet kushtetuese për shtyrjen e mandatit të organeve të Vettingut deri në fund të 2024. PS kërkon shtyrjen e këtij mandati, ndërsa PD nuk ka ende një qëndrim zyrtar për këtë çështje.
Po sot në Kuvend pritet të kthehet edhe ish-kryeministri Sali Berisha pas një mungese të gjatë, që pas pezullimit nga kryedemokrati Lulzim Basha që u pasua nga një aksion brenda partisë. Ka qënë vetë Berisha ai i cili ka paralajmëruar se do të rikthehet në Kuvend sot, së bashku me anëtarët e tjerë të grupit të Rithemelimit.
RENDI I DITËS:
(Në orën 17:00, seancën plenare e përshëndet Shkëlqesia e Tij, Presidenti i Republikës së Turqisë, z. Recep Tyyip Erdogan)
- Hapja e sesionit të II të legjislaturës së X të Kuvendit të Shqipërisë (Neni 74, pika 1 të Kushtetutës, neni 42, pika 1 të Rregullores)
- Miratimi i procesverbalit të seancës plenare datë 20.12.2022 (Neni 44, pika 2 e Rregullores)
- Njoftime (Neni 44, pika 3 e Rregullores)
