Ekzekutimi mafioz i dy vëllezërve Astrit dhe Brahim Bilali mëngjesin e së shtunës në Shkodër, u shoqërua me shkarkimin e drejtorit të policisë atje, Vehbi Bushati, i cili u zëvendësua me Niko Brahimajn.
Por siç duket, ndryshimet në radhët e uniformave blu nuk do të përfundojnë me kaq. Pas ndryshimit të drejtorit, ikën edhe shefi i komisariatit, Vasil Çela. Në vend të tij është emëruar Lorenc Meta.
Dy vëllezërit Bilali u përcollën për në banesën e fundit pasditen e së dielës. Shkodra ishte e blinduar nga forcat e policisë për varrimin e dy vëllezërve, pasi në ceremoninë mortore mori pjesë edhe Asmer Bilali, djali dhe nipi i viktimave, i cili është në paraburgim si një nga anëtarët e grupit “Bajri”.
Pranë trupit të viktimës Astrit Bilali u gjet një pistoletë, me të cilën dyshohet se i ndjeri u kundërpërgjigj me zjarr ndaj atentatorëve. Sipas policisë, makina tip Benz që përdorën ekzekutorët ishte shpallur e vjedhur që nga viti 2018, dhe ishte me targa false. Në automjetin e djegur u gjet edhe arma automatike me të cilën u krye vrasja.