Kosova është duke luftuar për të fituar një biletë për në finalet e “Euro 2020”, përmes kompeticionit Nacional League. Por kjo nuk është alternativa e vetme, pasi nëse nuk e arrijnë përmes këtij kompeticioni, atëherë do të duhet të luftojnë në grupin A eliminator.
“Dardanët” do të përballen sot me Malin e Zi, një kombëtare që ka në përbërje lojtarë me origjina të ndryshme. Kjo përballje duket se ka “mërzitur” serbët, të cilët kanë bërë një thirrje absurde.
Mediat serbe, më konkretisht “Informer”, iu ka bërë një thirrje lojtarëve serbë të Malit të Zi, që të mos pranojnë të luajnë sonte kundër Kosovës.
“Nëse jeni serbë, nuk duhet të luani kundër Kosovës. Pesë nga lojtarët tanë të Malit të Zi nuk duhet të kenë asnjë dilemë të premten. Serbë, tani tregoni se nderi juaj është më i rëndësishëm se çdo gjë! Trajneri Lubisa Tumbakovic dhe lojtarët e tij, Mirko Ivanic, Filip Stojkovic, Vukan Savicevic, Adam Marusic dhe Marko Simic, kanë lindur në Serbi. Ivanic ka lindur në Backi Jarak, Filip Stojkovic në Cuprija, ndërsa Vukan Savicevic, Adam Marusic dhe Marko Simic në Beograd. Ata të gjithë zgjodhën të luanin për Malin e Zi, sepse mendonin se në kombëtaren e Serbisë nuk do të kishin hapësirë”.
Kjo gazetë serbe është përpjekur të lidhet me lojtarët e Crvena Zvezda, Ivanic dhe Stojkovic, por ata nuk janë përgjigjur në telefon, as përmes mesazheve. E njëjta gjë edhe me Vukan Savicevic, i cili tani luan për Wisla Krakova.
