Nënkryetarja e Komisionit të Integrimit, Senida Mesi, ka folur rreth kritikave që qeveria ka marrë për indiferencë ndaj shqiptarëve në Siri.
E ftuar në emisionin “Ditari” në A2, Mesi tha se qeveria i ka në vëmendje por që nuk janë raste që duhen bërë publike. Kjo sipas saj do t’i rrezikonte ata, duke i bërë target për terroristët.
“Ishte rasti i Alvinit që e nxori në dritë këtë fenomen. Nuk e pranoj që shteti shqiptar nuk është i ndjeshëm me këto raste. Në kampin Al-Hawl ndodhen shumë individë që janë rekrutuar në mënyrat nga më të çuditshme për të luftuar atje. Qeveria i ka vëmendje, por nuk janë raste që duhen bërë publike, pasi të gjithë ata që ndodhen aty mund të kthehen nga terroristët atje në subjekt. Raste të tilla duhen trajtuar me diskrecionin më të madh. Duhet patur vëmendje te parandalimi i rasteve të tilla, parandalimi i radikalizmit. Askush nuk ka shkuar me detyrim, por me dëshirën për të shërbyer për diçka. Rikthimi është i vështirë dhe duhen kaluar disa procedura, në mënyrë që këta individë të riintegrohen dhe të kthehen ata që ishin para se të shkonin në ato kampe”, tha ajo.
Sa i përket faktit nëse shteti shqiptar ka informacion të plotë në lidhje me shtetasit shqiptarë në Siri, ajo u përgjigj:
“Është një vend që nuk ka shtet që të komunikosh me institucione. Sigurisht që qeveria ka informacion, por nuk mund të them a është 100% i plotë”.
Në lidhje me minishengenin ballkanik dhe distancimit që mund të krijojë mes qeverisë shqiptare dhe asaj kosovare, Mesi theksoi:
“Kryeministri Edi Rama i ka kërkuar në Serbi qeverisë serbe njohjen e Kosovës. Rama nuk ka reshtur së lobuari për njohjen e Kosovës, në çdo takim. Mosnjohja nuk duhet të përjashtojë Kosovën të bëjë marrëveshje bilaterale me Shqipërinë dhe Malin e Zi”.
