Ditën e djeshme, nëpër media qarkulloi lajmi se trupat e koalicionit me në krye SHBA-në do të tërhiqen nga Iraku, pas miratimit të rezolutës nga Kuvendi i Irakut. Lajmi është përgënjeshtruar nga Sekretari Amerikan i Mbrojtjes, Mark Esper. Ai ka thënë që forcat e Shteteve të Bashkuara nuk do të tërhiqen nga Iraku.
Lajmi për tërheqjen nga Iraku u përhap përmes letrës së një gjenerali, në të cilën nënkuptohej se SHBA-ja do të kryente një veprim të tillë. Sipas letrës, ushtria e SHBA-së do të ripozicionohej në bazë të kërkesës së deputetëve irakianë.
“Nuk është marrë asnjë vendim për t’u larguar nga Iraku. Nuk di çfarë është ajo letër. Po përpiqemi të kuptojmë se nga ka ardhur, por nuk ka pasur vendim për largimin nga Iraku, pikë”, tha sekretari amerikan.
Shtetet e Bashkuara kanë rreth pesë mijë ushtarë në Irak si pjesë e një task-force të përbashkët ndërkombëtare, e themeluar në vitin 2014 për të luftuar Shtetin Islamik.
