Guvernatori i Bankës së Shqipërisë, Gent Sejko ka folur në lidhje me situatën ekonomike në këto kohë krize, si dhe për politikat monetare të ndërmarra.
Në një komunikatë për mediat, Sejko tha se BSH ka marrë një paketë të plotë masash për situatën e krijuar. Ndërsa Këshilli mbikëqyrës i BSH vlerëson se politikat monetare janë të qëndrueshme.
Sejko sqaroi edhe nëse do të ketë një shtyrje të dytë për kreditë e shtyra. Ai tha se kjo gjë do të vendoset pasi të analizohet mbyllja e tre mujorit.
“Niveli i kredive të shtyra nga bankat është në masën ekuivalente 2 miliard euro. Do të ketë një sasi më të madhe të kredive të shtyra në vazhdim. Kemi parë një reagim nga bankat e nivelit të dytë në raport me kërkesat e shtyrjeve të kredive. Ne po shikojmë situatën financiare dhe sigurisht situatën e bizneseve dhe jemi duke analizuar. Sigurisht disa biznese do të kenë disa vështirësi financiare më të forta dhe disa më të lehta. Për momentin mund të them se do të shohim situatën”, tha ai.
