Gjatë seancës së sotme plenare, kreu i PD-së, Lulzim Basha ka pasur një përplasje me ministrin e Brendshëm, Fatmir Xhafajn.
Duke iu referuar përplasjes së bandave me policinë në Elbasan, kryedemokrati i kërkoi Ramës që të largojë Gramoz Ruçin dhe Fatmir Xhafën, si dhe të shkarkojë kryetarin e bashkisë së Elbasanit, Qazim Sejdini
“Largo Gramoz Ruçin dhe Fatmir Xhafën. Kërko shkarkimin e Qazim Sejdinit dhe largo kriminelët. Ju të gjithë e keni parë videon në Elbasan dhe shumica e shqiptarëve janë ndjerë keq kur kanë parë që policia u shpartallua nga një bandë. Të gjithë pyesin pse policia nuk hyri në magazinë? Policia nuk hyri sepse ajo magazinë është kështjella e krimit dhe bandës së Edi Ramës. Ka mbështetje dhe mbrojtje qeveritare dhe policia nuk e çan dot, prandaj policia nuk ka çfarë bën”, tha Basha.
I menjëhershëm ka qenë edhe reagimi i Xhafajt, i cili foli troç duke iu përgjigjur për cështjen e Elbasanit, ndërsa e akuzoi Bashën se në kohën që ky i fundit drejtonte ministrinë e Brendshme, kanabiasi mbillej nën mbrojtjen e shtetit.
“Ka padyshim dy histori lidhur me dy shembujt e trafikut dhe kultivimit të kanabisit. Një histori kur ju keni qenë në pushtet dhe kur keni qenë ministër i Brendshëm, historia e famshme e Lazaratit dhe Dukagjinit, ku kultivim i kanabisit ishte nën mbrojtjen e shtetit. Kjo është një pamje që shumë shpejt do bëhet publike edhe nga agjencitë ndërkombëtarë.
Ngjarjet e fundit e Elbasanit janë rrjedhojë e veprimit në rritje të policisë së shtetit kundër veprimtarive kriminele. Kam urdhëruar analizën e plotë të situatës në këtë qytet. Kam urdhëruar drejtuesit kryesor të hetimit në Policinë e Shtetit të instalohen në Elbasan. Kam kërkuar një analizë të plotë që të nxjerr në pah shkaqet e vërteta të këtyre ngjarjeve kriminale të këtyre dy grupeve kriminale Çelajt dhe Çapjat.
I kam kërkuar Shërbimit të Kontrollit të Brendshëm dhe Drejtorisë së Standardeve që të analizojnë veprimet dhe mosveprimet e policisë. Kam kontaktuar personalisht drejtuesit e lartë të prokurorisë, dhe u kam dhënë atyre mbështetjen tim maksimale dhe mbështetjen e Policisë së Shtetit, në funksion të zbardhjen së ngjarjes, dhe jo vetme të kësaj ngjarje. Në dijeninë time, prokuroria, aktualisht është duke zhvilluar hetime intensive të përbashkëta me Policinë e Shtetit, dhe është rasti që ajo të dëshmojë që është në lartësinë e detyrës. Problemet e policisë në Elbasan do jete pjesë e një analize të qartë për problemet aty. Nuk shfajësoj veprimet e mia apo gabimet e mia që mund të kemi. Reagimi ndaj veprimeve të policisë do jetë edhe më i madh. Ndaj ju kërkoj që ta mbështesni Policinë, pasi në pjesën më të madhe të saj është përbërë nga individë të ndershëm”, tha ndër të tjera Xhafaj.
