Fieri është ndalesa e radhës e turit ‘Deputeti që duam’, që po zhvillon PS-ja. Në fjalën e tij, kreu i qeverisë Edi Rama, është ndalur në sulmet e njëpasnjëshme të opozitës, duke thënë se po nxin qëllimisht për pandeminë. Ai u shpreh se opozita po terrorizon të moshuarit, duke thënë se nuk ka shtretër nëpër spitale, për tu trajtuar pacientët. Ndër të tjera, kryeministri Rama zbuloi mesazhin nga një personalitet, i cili është qetësuar pasi ka parë gjendjen e spitaleve COVID.
“Nuk ndodh që të gjendet një opozitë, që edhe për një pandemi që bie në 100 shekuj, nuk gjen dot arsyet për t’u bashkuar, jo me qeverinë, por me shumicën e njerëzve që janë në hall.
Dhe opozita në këtë rast është për ta qarë hallin, sepse është detyra jonë ta zgjidhim, siç po përpiqemi, por jo të bëjë opozita politikë me hallin deri në pikën që t’u kallë frikën, ti rrisë pasigurinë, duke përdorur instrumente të ulëta si shpifje, fabrikime, duke arritur realisht të shqetësojë familje e familje të tëra.
Sot kam marrë një mesazh nga dikush që nuk kam autorizim t’i përdorë emrin, nga një personalitet në moshë të thyer që më shkruan se “më në fund kam mundur të flej gjumë, pasi pashë realitetin e spitaleve, pasi nuk arrija do të flija gjumë nga ankthi që po të infektohesha nuk do gjeja dot shtrat në spital. Dhe është një personalitet i shquar. Ishte një mesazh çlirimi nga barra e tmerrshme mendore që kjo opozitë i ka ngarkuar atij dhe shumë të moshuarve si ai”.
