Presidenti iranian, Hassan Rouhani është shprehur se me sanksionet e reja të mundshme ushtarët evropianë në rajonin e Lindjes së Mesme mund të jenë në rrezik.
“Sot ushtarët amerikanë janë në rrezik, nesër ushtarët evropianë mund të jenë në rrezik. Ne nuk duam paqëndrueshmëri në botë. Ne duam që ju evropianët ta lini këtë rajon me mençuri, jo me luftë”, tha ai.
Mbretëria e Bashkuar, Gjermania dhe Franca, të cilat kanë nënshkruar marrëveshjen bërthamore të vitit 2015, akuzojnë Teheranin për shkeljen e paktit. Kjo shkelje mund të bëjë që OKB të vërë sanksione të reja ndaj Teheranit, të cilat do ta dobësonin shumë në ndeshje kundër SHBA.
Nga ana tjetër, Rouhani përmend edhe një pjesë të shkeljeve amerikane që sipas tij Evropa nuk ka reaguar ndaj tyre.
“Kur Trump shpërtheu kundër NATO-s çfarë bëtë? Po kur u largua nga UNESCO? Kur u largua nga Këshilli i të Drejtave të Njeriut në OKB, çfarë keni bërë?”, shtoi ai.
Reagimi i Iranit dhe kundër reagimi i Gjermanisë, Britanisë dhe Francës e kanë futur marrëveshjen bërthamore në kolaps.
Që nga viti 2018, kur Shtetet e Bashkuara dolën nga pakti, Irani ka tejkaluar kufijtë në sasinë e uraniumit dhe nivelin e pasurimit, përtej kufirit të vendosur prej 3.65% . Në mosmarrëveshje, Evropa zgjedh sanksione dhe, për këtë arsye, në sytë e Teheranit Europa ka zgjedhur anën e Shteteve të Bashkuara.
