Kryeministri Rama i është kthyer me ironi akuzave të shtuara së fundmi nga kryetarja e LSI-së, Monika Kryemadhi, në lidhje me territorin e shkollës “Sami Frashëri”. Monika Kryemadhi tha më parë se trualli është dhënë për pallat. Në kundërpërgjigje, Rama tha se kjo është një betejë e përditshme, ‘për të mos lejuar që faktet të bëhen si avujt e rakisë presidenciale’.
“Është një betejë e përditshme, për të mos lejuar që faktet të bëhen si avujt e rakisë presidenciale. Faktet janë viktimë e rrjeteve sociale, e shpërndarjes së qëllimshme të shpifjeve dhe gënjeshtrave. Për fat të keq Monika, Iliri dhe Saliu janë absolutisht në vendin e duhur dhe në kohën e duhur”.
Kryeministri shtoi se shkolla po ndërtohet, dhe ky është një debat i kotë. Pak më herët, ndryshe nga ato që deklaroi Kryemadhi, Veliaj publikoi dokumentet nga Kadastra ku vërtetohet se pronësia e shkollës “Sami Frashëri” është e Bashkisë së Tiranës. Ai ka ironizuar Kryemadhin, duke deklaruar se ajo duhet çuar për shpifje ose për mjekim.
