Kryetari i Partisë Lidhja në Itali, Mateo Salvini, i cili është pjesë e koalicionit qeverisës në ekzekutivin e kryeministrit Mario Draghi, deklaroi se Shqipëria dhe Serbia duhet të jenë ndër të parat që duhet të integrohen në Bashkimin Europian.
Deklarata e Salvinit u bë ditën e sotme në një intervistë për RTV Ora. Sipas Salvinit, këto dy shtete janë shumë pranë Europës sa i takon historisë gjuhës dhe kulturës, ndaj duhet të anëtarësohen të parat nga Ballkani Perëdnimor.
Ndër të tjera, Salvini u shpreh se zgjerimi i Bashkimit Europian është diçka pozitive për të dyja palët, por disa herë procesi mund të hasë edhe pengesa.
Matteo Salvini: ”Në të shkuarën Bashkimi Evropian është zgjeruar shumë shpejt (kufijtë e saj), pa u pasur bazë solide e rrënjë solide. Prej shumë vitesh po arsyeton për pranimin e vendeve shumë më të largëta me ne nga të gjitha këndvështrimet, dhe e them me respekt, për vende si Turqia. Ndërsa vendet më pranë nesh për nga historia, gjuha, kultura, ekonomia si Shqipëria e Serbia, duhet të jenë të parat sipas mendimit tim. Por kujdes e po ju paralajmëroj se disa norma të funksionimit të Bashkimit Evropian, ka raste që janë pengesa. Por mendoj se nëse familja zgjerohet do të jetë një gjë pozitive për të dyja palët.”
