Deputeti Ervin Salianji kërkon largimin e Bashës nga drejtimi i PD-së. Qëndrimi i tij pason pas rezultatit të zgjedhjeve të 6 Marsit, ku madje ai e cilëson si katastrofik.
Në një analizë të përgjithshme të asaj se çfarë ndodhi, Salianji shprehet se opozita u dëmtua dhe mori më pak se gjysmën e votave që grumbulloi më 25 Prill, dhe se bojkoti i votuesve tregoi krizën e besimit tek opozita.
Për të, përgjegjësia kryesore është tek kryetari i partisë. Mesazhi që ka Salianji ndaj kryedemokratit Basha është që të bëjë një hap pas, dhe të krijojë mundësinë që PD të zhvillojë zgjedhje.
“Rezultati i zgjedhjeve të 6 Marsit ishte katastrofik për Partinë Demokratike.
Kandidatët e PDSH në 6 bashki ishin demokratë dinjitozë, ata bashkë me demokratët bënë çdo përpjekje, por fryma popullore ishte mesazh i qartë për çdo demokrat. Opozita u dëmtua dhe mori më pak se gjysmën e votave që grumbulloi më 25 Prill, bojkoti i votuesve tregoi krizën e besimit tek opozita. Të gjithë kanë përgjegjësi për këtë situatë, përgjegjësia kryesore është tek kryetari i partisë.
Personalisht kam bërë beteja të ashpra duke rriskuar gjithçka, kam luftuar fort për të ndihmuar që Partia Demokratike të vijë në pushtet.
Kam bërë beteja që Lulzim Basha të jetë kryetar i Partisë Demokratike sepse kam menduar që ishte rruga e duhur që PDSH të vijë në pushtet!
Sot nuk mund të mbyll sytë dhe as të fshihem, duhet ta lexojmë realitetin duke marrë çdo përgjegjësi, por përgjegjësia kryesore bie tek kryetari i partisë!
Lulzim Basha e ka humbur mbështetjen, fatkeqësisht si kryetar partie është barrë e rëndë për opozitën!
LB duhet të bëjë hap pas dhe të krijojë mundësinë që PD të zhvillojë zgjedhje!
Demokratët janë fitues, nuk pranojnë të quajnë fitore vendin e tretë! Partia Demokratike do të ribëhet, forca dhe energjia e demokratëve është e pashtershme!”.
