Ish-ministri i Drejtësisë, Ylli Manjani, ka lëshuar një deklaratë të fortë ndërsa thotë se kryeministri Edi Rama po merr masa të egra edhe ndaj atyre që e lavdërojnë nëpër rrjete sociale. Komenti i tij vjen në një kohë kur radhët në Kakavijë vazhdojnë prej 3 ditësh të jenë kilometrike.
Sipas Manjanit, komentuesit më të ashpër në Facebook, që nuk pranojnë asnjë kritikë nga Edi Rama, jetojnë në Greqi e në Itali. Ndaj tyre, Edi Rama merr masat më të egra. Ai shton më tej se shqiptarët që jetojnë në Greqi, i lë rregullisht në radhë e ndërsa ata të Italisë i gjëmonte me policë e gjoba të larta në fillim të marsit. Pas 3 ditëve në radhë në Kakavijë për të kaluar kufirin në Greqi, Forcat e Armatosura shqiptare dolën në terren, për të furnizuar me ujë qytetarët.
Statusi
Komentuesit më të egër në FB, që nuk pranojnë asnjë kritikë nga Edi Ramës jetojnë në Greqi e në Itali.
Pikërisht ndaj tyre Edi Rama merr masat më të egra.
Keta të Greqisë i lë rregullisht në radhë duke shkumëzuar për të hyrë e dalë në Shqipëri. Ata të Italisë i gjëmonte me policë e gjoba të larta në fillim të marsit.
Sa më egër i trajton Edi Rama aq më shumë e lavdërojnë!
Jo shumica, sigurisht.
P.S. Jo për cinizëm, po për hir të së vërtetës duhet t’ua sjellim në vemendje këto fakte “komentuesve pasionantë”, që ende e shohin Edi Ramën si udhëheqës global…
