Gjendja e jashtëzakonshme do zgjatet edhe pas 25 prillit. Kjo u konfirmua sot nga kryeministri Rama, ndërsa prej javësh Shqipëria është e izoluar. Ndonëse shpresat u shtuan me uljen e numrit të të prekurve, daljet e fundit të Ministrisë së Shëndetësisë raportuan për një situatë më kritike.
Sikundër e nënvizoi edhe kreu i qeverisë, Edi Rama, kthimi në normalitet do të jetë proces jo i shkurtër. Kryeministri nuk e specifikoi se deri kur do të zgjatej kjo gjendje. “Patjetër që do të zgjatet gjendja e emergjencës pas 25 prillit”, tha ai.
Në një komunikim LIVE, kryeministri Edi Rama, publikoi listën e bizneseve që do të hapen prej datës 27 prill.
Këto biznese do të hapen pas një muaj mbyllje, për shkak të pandemisë së koronavirusit. Hapja e tyre do të bëhet pas aplikimit në e-Albania. Edi Rama njofton se të gjitha bizneset duhet të marrin vërtetimin për hapje aktiviteti në e-Albania, dhe të njihen me protokollin e sigurisë përmes e-Albania. Vërtetimi dhe protokolli duhet të disponohen në mjediset e biznesit përkatës.
