Opozita nuk ka përcaktuar në platformën e shpalosur sot afatin që do duhet të ketë Qeveria tranzitore. Basha tha se qëllimi ishte që diskutimi të fokusohet në thelbin e 10 detyrave që parashikohet të ketë Qeveria e re pa Edi Ramën kryeministër, dhe që do të garantojë zgjedhjet e lira e të ndershme. Sipas tij, afati dhe procedurat e tjera do të shpalosen në vijim, por fokusi duhet të jetë mbi detyrat që duhet të ketë Qeveria tranzitore.
“Afati do të jetë i mjaftueshëm, për të garantuar procesin zgjedhor”, deklaroi Basha.
10 do të jenë detyrat e mandatit të qeverisë kalimtare, me kryefjalë zhvillimin e zgjedhjeve të lira dhe të ndershme. Edi Rama dhe qeveria aktuale, thuhet në platformën e partive të koalicionit opozitar, nuk mund të garantojnë zgjidhjen e problemeve, që pamundësojnë zgjedhje të lira dhe të ndershme.
