Spitali Universitar “Shefqet Ndroqi”, i cili prej muajsh shërben si Covid-2, ka reaguar pas skandalit ku një sanitare kishte marrë 8 milionë lekë. Sanitarja Tire Alldërvishi i kishte zhvatur 30-vjeçares lekët, duke i premtuar se do i shpëtonte të ëmën nga koronavirusi.
Duke marrë shkas nga ky rast çnjerëzor, spitali dënon ashpër këtë akt. Po kështu një apel i hapur vjen drejt autoriteteve, që të kryejnë hetimin e rastit deri në fund.
Në reagimin e shpërndarë për media thuhet se personeli shëndetësor i spitalit “Shefqet Ndroqi” ndjehet i befasuar nga veprimi korruptiv, ç’njerëzor i sanitares dhe se e dënon me forcë këtë akt të paligjshëm.
“Gjithë personeli shëndetësor i spitalit “Shefqet Ndroqi” ndjehet tejet i lënduar, befasuar nga veprimi korruptiv, ç’njerëzor i sanitares me inicialet T.A dhe dënon me forcë këtë akt të paligjshëm, korruptiv i bërë publik në emisionin investigativ ‘STOP’.
Ky akt i shëmtuar dhe i papërgjegjshëm nuk mundet kurrsesi të njollosë punën vetëmohuese dhe të jashtëzakonshme të personelit shëndetësor të spitalit “Shefqet Ndroqi”.
Personeli shëndetësor i spitalit, duke u distancuar nga ky veprim, do të vazhdojë të ofroj me përkushtim shërbimin shëndetësor në kohë dhe me cilësi. Mbas shkarkimit nga puna e sanitares i kërkojmë autoriteteve kompetente të kryejnë hetimin deri në fund të këtij rasti. Personeli i shërbimit shëndetësor ‘Shefqet Ndroqi”.
