Në kuadër të një stërvitjeje të përbashkët të quajtur “Mburoja Sllave 2019”, që Moska po zhvillon me Beogradin, Rusia ka dërguar sistemin e saj S-400 dhe atë Pantsir-S në Serbi. Kjo stërvitje e përbashkët po realizohet me qëllim për të testuar aftësitë mbrojtëse të të dyja vendeve.
Nga ana tjetër, Aleanca e Atlantikut Verior thotë se e “respekton” vendimin e Serbisë që të mbajë stërvitje ajrore ushtarake me Rusinë.
“Aleanca dhe Serbia janë partnerë dhe ne respektojmë të drejtën e Serbisë që të ndërmarrë vendime sovrane lidhur me stërvitjet ushtarake që kryen në territorin e saj”, tha zyra e shtypit e NATO-s për Radio Evropa e lirë.
“Kjo është një çështje që i përket Serbisë dhe Rusisë. Serbia është partner i NATO-s dhe vendet e Ballkanit kanë një marrëdhënie të mirë dhe produktive me Aleancën Perëndimore”, shtoi zyra e shtypit e NATO-s.
Ministria e Mbrojtjes së Rusisë tha se sistemet tokë-ajër janë vendosur në bazën në Batajnicë, që gjendet në periferi të Beogradit. Ndërsa nënvizoi se është hera e parë që sistemet S-400 dhe Pantsir-S marrin pjesë në stërvitje ushtarake jashtë Rusisë.
Sistemi S-400 do të kthehet në Rusi më 29 tetor, pasi të përfundojnë stërvitjet.
