Rusia regjistroi 752 viktima nga koronavirusi në 24 orët e fundit, çka shënon numrin më të lartë të të vdekurve gjatë kësaj periudhe kohore, që nga fillimi i pandemisë, ndërsa vendi po përballet me valën e tretë.
Autoritetet shëndetësore raportuan të shtunën edhe për 25,082 raste të reja pozitive, prej tyre 5,694 në Moskë, shkruan Al Jazeera.
Rusia është duke përjetuar një valë të rëndë të infektimeve, që besohet të jetë shkaktuar nga varianti Delta i koronavirusit, teksa edhe procesi i vaksinimit po ecën me ritme të ngadalta.
Numri i përgjithshëm i të infektuarve në Rusi ka shkuar në mbi 5.7 milionë, duke u renditur si vendi i pestë në botë, ndërsa numri i viktimave arriti në 142,253.
Deri më tani, 18.9 milion persona nga 146 milion që është popullsia e Rusisë, janë vaksinuar, ndërkohë që autoritetet po përballen gjithnjë e më shumë me persona të cilët refuzojnë të vaksinohen.
Sipas Universitetit Johns Hopkins, që mbledh të dhëna për pandeminë, koronavirusi ka prekur mbi 186 milionë njerëz në të gjithë botën dhe ka vrarë mbi katër milionë.
