Dridhet Spanja. Sipas të përditshmes “EL Pais”, pjesëmarrja e “Furive të Kuqe” në Botërorin e ardhshëm që do të zhvillohet në Rusi është në rrezik.
Federata Spanjolle e Futbollit ka marrë një dokument nga FIFA ku paralajmërohet se mund të përjashtohet nga Botërori nëse qeveria spanjolle vazhdon planin për zgjedhjen e presidentit të ri të federatës.
Futbolli spanjoll është drejtuar përkohësisht nga Juan Padron, i cili ka marrë vendin e Angel Maria Villa, që u detyrua të largohej pas akuzave për korrupsion në verë.
Politika e FIFA-s është të pezullojë çdo federatë që është anëtare e saj nëse verifikohen presione apo ndërhyrje të politikanëve në federatat e futbollit.
Por, nuk ka vonuar shumë dhe presidenti i përkohshëm, Juan Larrea ka siguruar se askush nuk do mund ta largojë Spanjën nga Kupa e Botës. “Takimi do të jetë informativ dhe në asnjë rast ndëshkues”, ka thënë fillimisht shefi i përkohshëm i RFEF-së për gazetën AS.
“Askush nuk do mund ta largojë Spanjën nga Kampionati Botëror. Është e pamundur dhe nuk është folur kurrë. Nuk do të ndodhë. Çfarë duan këta njerëz? Se Spanja të tërhiqet nga turneu kështu që Italia mund të hyjë? Federata funksionon normalisht, ekipi kombëtar fitoi vendin e tyre (në Kupën e Botës) në fushë, dhe FIFA pajtohet me ne për këtë”, përfundoi Larrea.
