Presidenti i SHBA-ve, Donald Trump ka reaguar lidhur me lajmin se rusët kanë paguar talebanët, për të vrarë trupat amerikane në Afganistan.
Përmes një postimi në rrjetet sociale, Trump e ka mohuar këtë fakt duke akuzuar edhe “New York Times” për shpifje.
Sipas medias së njohur, e gjithë kjo histori është zhvilluar vitin e kaluar, ndërkohë që forcat e koalicionit të udhëhequra nga SHBA dhe NATO po ndihmonin në arritjen e paqes mes autoriteteve afgane dhe talebanëve. Në shkrimin e kësaj gazete theksohet se Trump është vënë në dijeni të kësaj gjëje në muajin mars.
“Askush nuk më ka njoftuar, as zv/presidenti Pence apo Shefi i Stafit Meadows për të ashtuquajturat sulme mbi trupat tona në Afganistan nga rusët, ashtu siç u raportua përmes një “burimi anonim” nga Fake News ‘New York Times’. Të gjithë po e përgënjeshtrojnë dhe nuk ka pasur shumë sulme mbi ne. Askush nuk është treguar më i ashpër me Rusinë sesa Administrata Trump. Me të korruptuarit Joe Biden dhe Obama, Rusia e pati të lehtë të merrte pjesë të rëndësishme të Ukrainës. Kush është burimi i tyre?”, shkruan Trump.
