Kryeministri Rama ka komentuar për herë të parë thashethemet që qarkullojnë mes të djathtëve, se Rama ka bashkëpunuar me Rudina Hajdarin për faktin se ajo qëndroi në kuvend dhe vendosi të mos e djegë mandatin.
Duke folur në foltore, Rama tha se Hajdarin nuk e ka takuar asnjëherë dhe madje as nuk ka kontaktuar me të. Kryeministri zgjodhi të komentojë edhe krijimin e partisë Bindja Demokratike, për të cilën tha se u krijua nga vetë Sali Berisha.
Fjala e Ramës:
Thonë që Bindjen Demokratike e paskam krijuar unë. Pse e formova unë dhe nuk e formoi Saliu? Ku ndryshon Patozi nga Saliu ose më saktë nga Luli ?
Astrit Patozin e ka futur Saliu në zgjedhje, jo unë. Një çun për rrugë, një çun për zgjedhje pastaj të shohim ku të dalë. Ne hoqëm PD-në, tani duhet të sjellim një Bindje Demokratike?
Ku dola unë që paskam nxitur zonjën Hajdari që mos ik nga parlamenti? S’e kam takuar asnjëherë dhe as kam folur ndonjëherë. Me Hajdarin bëj të njëjtën gjë që bëja me të atin e Hajdarit, njerëzit janë kryesisht pa kujtesë.
Unë e nxora zonjën Hajdari në listë? Unë vërtetë bashkëpunoja me Lulin, po nuk kemi ndërhyrë kurrë te listat e njëri-tjetrit. Madje Patozi ka bindjen që e kam hequr unë nga lista, ma ka thënë këtu në parlament direkt akuzën. Faji im ishte që baba do zgjidhte mes çunit me duar në xhepa dhe çunit me xhepa plot?
Ku e keni parë ndonjëherë Saliun të mos shajë atë që i bie ndesh, si ka mundësi që s’po e shan fare Patozin? Di që unë s’kam asnjë lidhje me këtë punë dhe as s’më intereson fare, një copë SHQUP-i e kemi në garë, një tjetër në rrugë, ndryshimi është që kjo këtu nuk e do Monikën, ajo e do. Opsioni tjetër, kemi Astritin për t’u bashkuar edhe me Monën, si pasojë e ha Myslimi (qesh e gjithë salla).
Është mirë t’jua kujtojmë njerëzve se kemi bërë një ligj për të gjithë ata që pengojnë votimin./ Tirana Today
