Deputetja e Partisë Demokratike, Rudina Hajdari ka folur sot në foltoren e Kuvendit, ku ka treguar edhe një herë arsyet përse ka vendosur të mos e djegë mandatin e saj.
Hajdari tha se askush s’mund ta gjykojë vendimin e saj, ndërsa shtoi se ajo do të bëjë hapa të sigurt larg politikës së vjetër dhe se do të vijë me propozime konkrete për ta kthyer vendin në normalitet.
“Dua të sjell një model të ri demokratik, një frymë të re parlamentare, unë si çdo deputet jam përgjegjëse para zgjedhësve të mi”, tha ndër të tjera Hajdari.
Fjala e deputetes:
Shqipëria nuk duhet të shihet si një faktor destabilizues në Ballkan. Ne duhet të jemi shumë në këtë perspektivë, të mos lejojmë veten të bëhemi shembull i së keqes në sytë e botës. Shembulli i kësaj që thashë është edhe qeveria, që refuzon të shohë vrasjet, largimin në masë të qytetarëve, abuzimin me fëmijët.
Kjo qeveri gjysmake e votuar vetëm nga 23% e shqiptarëve, nuk do t’ia dijë më për qytetarët e saj.
Këtë e tregon qartë edhe raporti i fundit i DASH. Qeveria s’mund të përdore BE-në si alibi për të shmangur përgjegjësitë e saj. Unë si çdo deputet jam përgjegjëse para zgjedhësve të mi. Asnjë s’mund ta gjykojë vendimin tim, ashtu si vet historia, unë do bëj hapa të sigurt larg politikës së vjetër. Do vij me propozime konkrete për ta kthyer vendin në normalitet
Dua të sjell një model të ri demokratik, një frymë të re parlamentare që do i japë fund tranzicionit në Shqipëri. / Tirana Today
