Deputetja e opozitës Rudina Hajdari, pas përfundimit të tryezës së reformës zgjedhore thumboi Presidentin Ilir Meta duke theksuar se nuk “është e mjaftueshme që të dalim në sheshe dhe të ulërasim”.
Përgjatë një prononcimi për mediat, Hajdari theksoi se duhet të ndërmerren hapa konkretë.
“Kishim për të diskutuar mbi temën e propozimeve që do të kishim në tryezë për ndryshimin e sistemit, por u shty me konsensus, në 6 mars. Dua të theksoj se vendosmëria ime dhe e opozitës parlamentare vazhdon dhe do të bëjmë propozimet tona. Sugjeroj plotë që dhe partitë e tjera ta marrin seriozisht këtë iniciativë.
Nëse do flasim sot të shprehim vullnetin tonë për të përshëndetur vullnetin qytetar për të qenë i përfaqësuar në parlamenti, duhet të respektojmë nenin 2 të Kushtetutës. Nuk mjafton që të dalim në sheshe dhe të ulërasim, por të bëjmë hapa konkrete që kanë të bëjnë me hapjen e listave që njerëzit të kenë mundësi që të përfaqësohen sot. Kjo gjë nuk po ndodh sot.
Ne duhet t’i tregojmë popullit se jemi këtu për ata dhe se nesër përfaqësimi i tyre do të jetë i denjë. Uroj që javës tjetër të vijojmë misionin për hapjen e listave për një sistem të barabartë për të gjithë”, tha ajo.
