Pas përfundimit të mbledhjes së Këshillit Politik për Reformën Zgjedhore, deputetja Rudina Hajdari theksoi se as Partia Demokratike nuk e ka mbështetur idenë e listave të hapura.
“E kuptoj Edi Ramën që me këtë sistem është bërë autoritar dhe i pasur, por nuk e kuptoj Bashën përse e do këtë sistem që ka bërë Ramën perandor?
Përse Basha do ta mbajë Ramën perandor? Përse sot këta qëndruan bashkë kundër këtij propozimi, i denjë, i realizueshëm në një kohë të shkurtër dhe nuk e bënë? Thanë gjëra të ndryshme”, u shpreh Hajdari.
Kjo e fundit, në vijim i mëshoi faktit se nuk do dorëzohet.
“Unë nuk dorëzohem sepse nga një anë kemi klasën e vjetër dhe në anën tjetër shqiptarët që duan ndryshimin e sistemit. Këta nuk e duan dhe duan të mbajnë këtë sistem, sepse i konvenjon Ramës dhe Bashës. Propozova të rrinim sot deri vonë, u çuan, pasi nuk morën përgjigjet që donin.
Erdha në këtë tryezë me qëllim ndryshimin e sistemit. Erdha këtu edhe me dëshirën për të gjetur një formulë kompromisi që ta pranonin të gjitha palët dhe sot propozova një formulë të mbështetur nga ndërkombëtarët dhe Ambasada Amerikane që e hap listën pjesërisht.
Edhe këtë ma hodhën poshtë. Përse këta njerëz kanë kaq frikë për të ndryshuar sistemin, për të hapur listat, për t’u dhënë shqiptarëve të votojnë përfaqësuesit e tyre? Nuk e pranuan sepse kanë frikë nga vota e qytetarit”, tha Hajdari.
