Deputetja demokrate, Rudina Hajdari, ka përgënjeshtruar lajmin se do të krijojë partinë “Bindja Demokratike”, madje e ka cilësuar lajmin si të rremë. “Opozita.com”, pasi ka kontaktuar me deputeten, është ndeshur me një lajm ndryshe nga çfarë është pretenduar më herët.
Në një bisedë telefonike, deputetja Hajdari përgënjeshtron krijimin e partisë së re “Bindja Demikratike”.
Sipas Rudina Hajdarit, ky është trillim i mediave qeveritare, për të ulur vlerat e opozitës së re.
“Opozita e Re i kalon përmasat e demokratëve të larguar apo ish-ministrave të qeverisë Berisha. Ne synojmë krijimin e një koalicioni më të gjerë, me çdo faktor të djathtë, me qëllim largimin e kastës mafioze në politik dhe pushtet”, ka thënë ajo.
Rudina Hajdari ri-konfirmoi që nuk synon çarjen dhe shkatërrimin e Partisë Demokratike, por krijimin e një alternative të re, pasi Lulzim Basha ka zgjedhur koalicionin me Monika Kryemadhin dhe kundër aleatëve perëndimor.
Po kështu, edhe deputeti Myslim Murrizi, i ftuar në emisionin “Kjo javë” në “News 24″, deklaroi se Rudina Hajdari nuk ka firmosur krijimin e ndonjë partie, por këto janë lajme që kanë qarkulluar në media.
“Fakti që është në Parlament, shqiptarët nuk duhet të merren me fjalët e saj, pasi po të hapësh kasetat e TVSH, gjen gabime politikanësh plot. Ajo është e re në këtë rrugë, të jem i sinqertë nuk kam parë ndonjë deklaratë të Rudinës që ka firmosur, këto i nxjerrin mediat.
Unë besoj që për çdo forcë politike jo komuniste, liderët nuk emërohen dhe në çdo parti e re që mund të krijohet, liderët caktohen në zgjedhje. Unë kam qenë mbrëmë dhe kemi biseduar. Unë jam pak i vështirë për të diskutuar skutave.
Të jem i qartë, akoma sot nuk kam parë asnjë prononcim të Rudinës, që të thotë që kam krijuar parti”, tha Murrizi.
