Deputetja Rudina Hajdari ka marrë pjesë në seancën dëgjimore me Komisionin për Çështjet e BE në parlamentin e Holandës. Në një postim në Facebook, deputetja shkruan se Shqipëria e meriton hapjen e negociatave.
Hajdari ndodhet në një vizitë zyrtare në Holandë e shoqëruar nga kryeparlamentari Gramoz Ruçi dhe kreu i grupit parlamentar të PS, Taulant Balla.
Postimi i Hajdarit:
Në cilësinë e Kryetares së Komisionit të Integrimit shpreha se Shqipëria dhe Shqiptarët e meritojnë hapjen e negociatave në qershor.
Në seancën dëgjimore me Komisionin për Çështjet e BE në Parlamentin e Holandës theksova se hapja e negociatave është e rëndësishme për destinacionin europian të vendit tonë.
Si anëtare e NATO-s prej dhjetë vjetësh, Shqipëria është një faktor stabiliteti, sigurie e paqeje në rajon e më gjerë. Hapja e negociatave është e rëndësishme për të mos braktisur orientimin dhe destinacionin europian të Shqipërisë dhe Ballkanit Perëndimor.
Hapja e negociatave do t’i japë impulse të reja bashkëpunimit të Shqipërisë me Holandën dhe vendet e BE-së në luftën kundër krimit të organizuar, trafiqeve dhe korrupsionit për një rajon me të sigurt.
Gjithashtu gjatë vizitës u takova dhe me të rinjtë Shqiptarë që janë modele pozitive. Studentë ekselentë që vijnë nga të gjitha rrethet e Shqipërisë për të studiuar për drejtësi në qytetin e Hagës.
