Gjatë fjalimit në foltoren e Kuvendit, deputetja Rudina Hajdari njoftoi se bashkë me grupin që drejton do të shkojë në çdo cep të vendit me qëllim ringritjen e së djathtës, por bëri një lapsus teksa u shpreh se: “Ne do vijojmë që të përçajmë të gjithë Shqipërinë”.
Siç duket, dhe këtë sesion të ri parlamentar nuk i kanë munguar emocionet, të cilat e kanë bërë që gjatë fjalimit të ketë probleme në artikulim. Por pas xhiros që këto gafa bënë në rrjetet sociale, Rudina Hajdari është kujdesur që të japë një sqarim.
Me anë të një statusi në Twitter, ajo shkruan se më mirë të bëj lapsuse, se sa të gënjej demokratët çdo ditë.
“Kam kaluar 17 vite në Amerikë dhe ky është fakt. Po më mirë lapsuset e mia se sa t’i gënjej demokratët çdo ditë duke ju thënë që mos të kalojnë në eufori se 85% e shqiptarëve thonë “Rama ik” & “Basha & Kryemadhi hajde”. Ndërkohë i kanë lënë pa punë e pa bukë për hesapet e tyre”.
