Sot, në një spital të Italisë, u nda nga jeta Gjovali Kadeli, në moshën 53 – vjeçare . Ai ishte shtruar në një spital në Itali që prej muajit Mars sepse vuante nga një sëmundje në pankreas. Dy vite më parë, ai humbi bashkëshorten nga një sëmundje e rëndë. Kadeli ishte babai i 4 fëmijëve, 2 vajza dhe 2 djem.
Rrugëtimi i Gjovalin Kadelit është si më poshtë:
Vdekja e Gjovalin Kadelit bëri që të reagojnë shumë politikanë. Secili prej tyre shprehu dhimbjen dhe foli për figurën e deputetit të Lezhës. Kadeli ka qenë i angazhuar me tre forcat politike më të mëdha në vend. Për zgjedhjet e 25 qershorit ishte kandidati i dytë për Lëvizjen Socialiste për Integrim, në qarkun e Lezhës.
Gjovali Kadeli ka lindur në Lezhë, më 26 Dhjetor të vitit 1964. Ai u diplomua në Fakultetin Juridik “Luigj Gurakuqi” në Shkodër. Gjithashtu, ka përfunduar edhe në Fakultetin e Shkencave Shoqërore, në degën Marrëdhënie Ndërkombëtare.
Nga viti 1985 deri më 1989, Kadeli mbajti pozicionin si Drejtues (agronom i mesëm) në Ndërmarrjen Bujqësore në Lezhë. Nga 1989 deri në 1991, ai ishte kryetar i degës furnizim – shpërndarje N.B. Treshe. Nga viti 1994 deri në 2005 Kadeli u mor me biznes, ndërsa nga 2005 deri në 2009, ai ishte i punësuar në një kompani.
Karriera politike e Kadelit filloi në vitin 1991 me anëtarësimin në Partisë Socialiste. Nga viti 2000 deri në 2005-ën, ai ishte anëtar i Kryesisë së Partisë Socialiste të Lezhës. Në 2005 -ën, Kadeli ishte kandidat për deputet i PS-së. Ai ka qenë gjithashtu Kryetar i Partisë Socialiste Lezhë, anëtar i Asamblesë Kombëtare të PSSH-së, i zgjedhur në legjislaturat VII, VIII, Qarku Lezhë.
Duhet theksuar se Kadeli ishte deputet i Partisë Socialiste para zgjedhjeve parlamentare të 23 Qershorit 2013. Ai nuk u përfshi në listat e kandidatëve për deputetë të Partisë Socialiste për zgjedhjet parlamentare të 2013-ës. Pas largimit të Lëvizjes Socialiste për Integrim nga koalicioni qeveritar me Partinë Demokratike, Kadeli votoi pro ndryshimeve në qeverinë e Partisë Demokratike. Kjo e fundit e përfshiu atë në listat e saj të kandidatëve për deputetë, ku u zgjodh deputet i PD-së në Lezhë.
Pas marrjes së mandatit, Kadeli u largua nga Grupi Parlamentar i Partisë Demokratike dhe iu bashkua atij të Lëvizjes Socialiste për Integrim. Kadeli ka qenë gjithashtu anëtar i Komisionit Parlamentar për Ekonominë dhe Financat.
(TIRANA TODAY)
