Kryeministri Edi Rama ka komentuar akuzat e bëra nga opozita lidhur me segmentin rrugor Milot-Balldren, që sipas projektligjit të mbërritur në Kuvend do të kushtojë gati 260 milionë euro për 17.2 km.
Gjatë fjalës së tij në foltoren e Kuvendit, kryeministri iu përgjigj akuzave për korrupsion, teksa tha se ky aks rrugor do të jetë i standardit A evropian.
Fjala e Ramës:
Të dyja rrugët që do ndërtohen janë rrugë të standardit A. E vetmja rruga e tillë është një pjesë e Rrugës së Kombit.
Rruga Tiranë-Elbasan ka kushtuar trefish se është bërë copë-copë që në fillim.
Thonë se vjedhim me aksin Milot-Balldren. Duke qenë rrugë e standardit A do jetë një rrugë ku nuk do bashkëjetojnë automjetet me bagëtitë.
Do të jetë rrugë e standardit A europian. Nga ana tjetër do jetë një rrugë që nuk do pengojë banorët në të dyja anët, por nuk do i lejojë të hyjnë mes aksit kryesor, por do të thotë që ka dy rrugë paralele për ta, rrugë shërbimesh për të gjitha ata që jetojnë në anët e rrugëve. Në ato rrugë ka 13 mirëmbajtje, se vepra e vetme që meriton një farë respekti është Rruga e Kombit, po s’meriton të gjithë respektin së pari për faktin që kushtoi mbi 1 miliard dhe akoma s’ka mbaruar, së dyti nuk përmbush standardin A dhe së treti nuk është se garanton atë që ne u detyruam ta bëjmë me vendosjen e pagesës, mirëmbajtjen e vazhdueshme të saj. Ndërsa me këto kontrata kemi mirëmbajtje për 13 vjet, cdo gjë është në përgjegjësi të kompanive.
E fundit janë kompanitë që investojnë nga kapitali i tyre dhe shteti paguan vit pas viti. Si mund të diskutohet për kilometrat në këtë farë feje?
Marrim Orikum-Llogara, të gjithë e kanë parë vetë me sy rrugën se si edhe sot e kësaj dite cedon. Shko riparo, kthehu arno, kthehu vendos.
Ne duam të bëjmë rrugë evropiane, me standarde evropiane. Deri dje vinin nga Kosova dhe s’kishte as mbikalim, as nënkalim, po ktheheshin në rrethrrotullime me goma në mes.
Rruga Milot-Balldren ka dy tunele në atë pjesë. Është për të ardhur keq por ne për këtë jemi zgjedhur dhe do bëjmë ato që kemi thënë.
Nuk mbaj mend njëherë të vetme një punë që nuk është bërë tabelë shpifje e të akuzave ende pa filluar. Gjithmonë e njëjta gjë, vjedhje-vjedhje-vjedhje. Nuk di të gjej një punë që kanë bërë ata që shajnë e baltosin që meriton respekt pakushte. Bënë rrugë, bënë rrugë, bënë rrugë, ca rrugësh bënë? Bënë tendera!/ Tirana Today
