Kryetari i Partisë Demokratike, Lulzim Basha gjatë një bashkëbisedimi me mjekë dhe infermierë, shpalosi programin për shëndetësinë.
Basha tha se do të angazhohet që rrogat e mjekëve në spitalet publike dhe në sistemin publik shqiptar të jenë jo më pak se 1200 euro dhe të infermierëve jo më pak se 700 euro.
Sipas tij, objektivi është plotësisht i arritshëm është i buxhetuar dhe është i indeksuar me përvojat e rajonit.
Lulzim Basha: ”Kujdesi shëndetësor është në parametra më të ulët, me reformën dhe me hapat që do të hedhim ne do ta kemi plotësisht të mundur që qytetarët shqiptarë të marrin shërbimin e duhur shëndetësor duke paguar më pak se sa paguajnë sot. Hapi i parë “Paraja ndjek pacientin” përmes kartës së pacientit.
Në raport me sistemin spitalor, parimet të cilat ne do t’i ndjekim, janë parime të provuara se funksionojnë në shoqëri të cilave u është dashur të bëjnë tranzicionin nga një shëndetësi e falimentuar drejt një shëndetësie që së pari të jetë në gjendje të japë një shërbim dinjitoz.
Rrogat e mjekëve në spitalet publike dhe në sistemin publik shqiptar të jenë jo më pak se 1200 euro dhe të infermierëve jo më pak se 700 euro. Objektivi nuk është arbitrar është plotësisht i arritshëm është i buxhetuar dhe është i indeksuar me përvojat e rajonit. Hapi i dytë për të ndalur këtë rrallim dramatik të mjekëve dhe infermierëve që kujdesen për njerëzit është hapja e një fakulteti tjetër mjekësie, shtimi i kapaciteteve pra për të trajnuar mjekë të rinj’’.
